Turizmi në Shqipëri ka shënuar rritje të përgjithshme gjatë muajit korrik 2025, por të dhënat e INSTAT tregojnë një tjetër realitet për vizitorët nga Italia.
Ndryshe nga dy vitet e fundit, kur italianët përbënin një nga grupet më në rritje të turistëve në vend, këtë sezon prania e tyre ka rënë ndjeshëm.
Sipas statistikave zyrtare, Italia zë vetëm 10% të vizitorëve jo-rezidentë që u akomoduan në struktura turistike, pas Kosovës (21%) dhe Polonisë (11%).
Në të njëjtën kohë, Gjermania dhe Franca kanë shënuar një prirje rritëse, duke tejkaluar nivelin e vizitorëve italianë.
Operatorët turistikë dhe ekspertët e sektorit theksojnë se rënia e italianëve lidhet me çmimet e larta të këtij sezoni, si dhe me infrastrukturën ende të dobët, që nuk arrin të përballojë fluksin e rritur të pushuesve. Kjo situatë duket të ketë zbehur interesin e një prej tregjeve më të rëndësishme për turizmin shqiptar.
Megjithatë, në total, Shqipëria regjistroi një rritje prej 34,6% të vizitorëve dhe 33,5% të net-qëndrimeve në korrik 2025 krahasuar me një vit më parë. Përfituesi kryesor i kësaj rritjeje mbeten zonat bregdetare, ku vizitorët e huaj u rritën me mbi 50%.
Rënia e italianëve shihet si një sinjal alarmi për sektorin, duke treguar se rritja e përgjithshme e turizmit mund të fshihet pas problemeve strukturore që ndikojnë në besueshmërinë e tregjeve tradicionale për Shqipërinë.
Editorial
